Descripción

[Catálogo]

Podemos congratularnos pola saída dunha nova obra que nos remite de cheo a quen dá nome a esta nosa cátedra: Alexandre Bóveda.
Despois de tirarmos ao prelo o volume A Galiza de Bóveda, logo de presentar anteriormente as obras O que fixemos en Galicia. Ensaio sobre o concepto de práctica xenocida, de Antonio Míguez Macho e Fluxos migratorios e escola intercultural: un estudo diagnóstico en Galicia, de Sara López Gómez, vén de saír da imprenta o presente traballo, Alexandre Bóveda nos seus documentos. Catálogo.
Este volume é o resultado do traballo vizoso que desenvolve desde a súa creación a Cátedra e o Centro de Estudos e Documentación Alexandre Bóveda a prol da recuperación da figura, pensamento e obra daquel bon e xeneroso.
Agardamos que a mostra documental e o seu estudo preliminar que se presentan neste traballo sirva para valorizarmos na súa xusta medida quen foi, segundo palabras de Daniel R. Castelao, organizador esencial e ‘motor de explosión’ do galeguismo no primeiro terzo do século xx.

Cátedra Alexandre Bóveda.